〈好食〉隐世高质火锅　铜锣湾三锅

【A&M Diary】打边炉唔係肥牛就係黑豚肉、唔係芫荽皮蛋锅就係沙嗲锅，真係好闷架喎！所以今日就带A姐嚟到铜锣湾鹅颈桥附近嘅三锅，餐厅位置虽然隐秘，但口碑唔错，仲有好多少见嘅火锅配料，高质之余仲为味蕾带嚟全新感官剌激。另外店内亦有依家非常少见嘅海鲜鱼缸，食海鲜就肯定够新鲜啦！餐厅座位亦非常宽敞，坐得够晒舒服。

蕃茄薯仔鳄鱼肉汤
蕃茄薯仔汤肯定大家都食过，但加咗鳄鱼肉入去嘅，唔知你又试过未呢？当汤底滚起之后，就一定要先品尝一吓个汤！汤底用咗好多蕃茄，所以酸酸微微，够晒醒胃！而加咗鳄鱼尾胶嘅汤底，非常胶口，类似平时花胶汤嘅感觉，鳄鱼肉就有止咳嘅功效，而鳄鱼尾胶就充满骨胶原，够晒滋补！但更重点嘅係，我哋每人饮咗3大碗汤之后，都完全无口渴嘅感觉，相信汤底真材实料，无落味精。

手切牛小排
牛小排係前胸肋骨部位嘅肉，油花虽然相对肥牛少，但分布相当平均，望上去有啲似大理石嘅花纹。但因为油花相对均匀，所以食嘅时候唔会肥淋淋，係相对健康嘅选择，但肉质仍然非常软腍，肉味香浓。

手打松露墨鱼丸、手打鲜虾丸
呢度自家手打嘅丸真係非常惊喜！两款丸都非常弹牙，而且食嘅时候都会爆汁。鲜虾丸入面有劲多虾肉，但更喜欢嘅係松露墨鱼丸，松露味超香，继而淡淡爽弹墨鱼，绝对係必叫嘅选择。

鹅粉肠、猪天梯
唔太食内脏嘅A姐，见到鹅粉肠嘅时候，真係有少少惊，但鼓起勇气之后，却被佢独特嘅口感同味道吸引！其实我哋都係第一次食鹅粉肠，佢嘅口感粉粉哋，有类似食鹅肝嘅感觉，但因为油脂相对地多，所以鹅油嘅香味浓郁，口感丰盈！至于猪天梯係猪嘅上颚软骨，外形很似梯子，所以被称为猪天梯，口感同鹅粉肠相反，非常爽脆。

即炸响铃
呢度嘅响铃係餐厅自家製，外型长身，索汤能力更高！外层炸到金黄鬆脆，经过黄金3秒嘅轻轻一渌，除咗索晒汤嘅精华，更带有浓郁嘅豆味，值得一试。

秘制西洋菜饺、手工家乡韭菜饺、手工鲜虾水饺
新鲜自家包嘅水饺已经唔係新奇事，好多餐厅都有。但三锅嘅水饺就係叫叫即包，最大分别係个皮唔会雪到硬身，亦无咁易穿窿。而三款水饺都包到涨卜卜，劲足料，咬开嘅时候充满肉汁，我哋特别锺意西洋菜饺，除咗西洋菜味超浓又新鲜之外，入面仲加入咗虾，令水饺更鲜甜弹牙。

<

Tags：好食,隐世,高质,火锅,铜锣,三锅,Diary,打边,炉唔,

转载：文章来自用户投稿不代表本站观点，如有侵权请联系我们。