〈好食〉坚守大排档精神　必食沙嗲牛肉麵　长洲莲香咖啡

【A&M Diary】传统嘅冬菇亭大排档喺香港已经所剩无几，但原来喺长洲仲保留住一个！有长洲嘅老街坊就向我哋推介呢间屹立超过40年嘅莲香咖啡，餐厅由第一代传到第三代，八十后嘅老闆放弃文职工作，坚守大排档情怀，为街坊保留熟悉嘅味道，更新增唔少嘅创意食物，让大排档加入青春活力。

招牌炸猪扒、香炸鸡中翼
猪扒同鸡翼都係即叫即炸，够晒热辣辣！猪扒预先切件，食嘅时候够晒方便！味道方面，腌得入味，鹹香十足，而猪扒口感非常鬆化，亦保持住肉味，绝对係莲香嘅招牌名物之一。至于鸡中翼非常香脆，咬落去嘅时候，劲多肉汁。

沙嗲新鲜牛肉米通
如果沙嗲牛肉同公仔麵係最佳拍档，咁沙嗲牛肉同米通就好似牛郎同织女，可遇不可求，因为市面上有米通食嘅地方唔多，难得见到，就一定选择米通啦！上枱嘅时候，以为牛肉份量唔多，但一路食，先知入面仲有劲多牛肉，相信係煮嘅时候，将沙嗲、牛肉同米通捞匀，令米通同牛肉更索汁。沙嗲当然係主角啦，沙嗲味香浓，仲带有花生香，原来汤底加入咗好多花生碎粒，所以食嘅时候好有口感！牛肉採用新鲜牛肉，非常嫩滑！至于米通除咗外表索晒沙嗲汁，就连通心嘅部份亦注满沙嗲汁，真係超满足呀！

沙嗲爽滑猪润配自家製韮菜饺濑粉
一座建筑物，除咗外墙嘅装饰，地基都要好稳固。讲紧嘅係除咗沙嗲够香浓，其实本身嘅汤底亦花咗唔少功夫，用猪骨熬製，所以味道够厚实。除咗牛肉之外，原来猪润同沙嗲都劲夹！猪润煮到啱啱好，唔会太老，而且无苦味够新鲜，口感爽滑。至于韮菜饺係每日自家新鲜製造，馅料丰富，涨卜卜，韮菜劲多。

雪糕芝麻西多士
讲到大排档嘅美食，又点少得西多士呢！西多士上面有牛油同炼奶，因为夏天炎热，我哋另外加咗雪糕球，令即叫即炸嘅西多士，加添冰火交融嘅感觉。以为有炼奶又有雪糕就一定好甜？店主特别喺西多士入边加入芝麻，除咗可以中和甜味，更可以令味道有多重层次。

雪糕菠萝包
同样係冰火交融嘅又点止西多士呢？仲有呢个雪糕菠萝包！菠萝包外皮超鬆脆，麵包软熟，热辣辣嘅中间夹住一球朱古力雪糕。食嘅时候虽然会好论尽，但一层热、一层冻又一层热嘅刺激感，真係又high又dirty！

<

Tags：好食,坚守,大排档,精神,必食,沙嗲,牛肉,长洲,莲香,咖啡

转载：文章来自用户投稿不代表本站观点，如有侵权请联系我们。