〈好食〉重拾拍拖嘅感觉 靓景情调西餐 油麻地Bellevue Bar and Grill

【A&M Diary】自从同M佬一齐住之后，对方已经清楚知道自己最真实最赤裸嘅一面，有时落街，随意到连头髮都唔梳，妆都唔化。久而久之，好想重拾拍拖嘅感觉，所以决定book间靓靓餐厅，为对方悉心打扮一吓！今日嚟到位于油麻地嘅Bellevue Bar and Grill，餐厅位于高层，可以饱览油尖旺，远至大角咀一带嘅海景景色，靓景配美食，有得打卡之余，仲啱晒大家嚟呢度庆祝周年纪念啦！

麵包

落完order就送上餐前麵包，麵包焗到好香脆，特别锺意粟米包，入边真係有粒粒粟米，麵包充满住粟米嘅香甜味。

香煎蟹饼伴青柠珍珠

蟹饼煎到非常脆口，香口嘅外皮入面就有丝丝嘅蟹肉，满足感爆分！蟹饼厚实，肉质鲜甜，配上青柠珍珠，令蟹饼更清新。旁边仲有黑醋汁沙律，绝对係一个唔错嘅开胃菜。

香煎北海道带子半什菌忌廉汁

两大粒带子，煎到半生熟，外表微燶脆口，而入边软腍，口感一流。我就锺意成粒摆入口，感受满满嘅幸福感；而M佬就锺意切开嚟食，将美味时间现场。

龙虾浓汤伴海鲜云吞

食完前菜，就上浓汤喇！海鲜云呑同汤分开上，咁样可以保存汤料嘅口感。龙虾汤超浓郁，入口柔滑舞渣。至于炸过嘅海鲜云吞脆卜卜，馅料劲多虾肉，好弹牙。

鲜蚝浓汤

请问用咗几多只蚝去打呢个浓汤？汤底蚝味浓郁，非常鲜甜，原只嘅鲜蚝饱满，够晒满足。

烤银鳕鱼扒

鳕鱼扒厚身，鱼肉嫩滑，油脂丰富，口感丰腴！鱼皮超脆口，烤嘅时间啱啱好！我哋就略嫌酱汁较淡，适合淡口味朋友。伴碟有薯蓉同蔬菜，特别一讚个薯蓉超creamy！

烧美国安格斯熟成西冷扒

我哋比较少食熟成牛扒，所以今次某程度都係为咗熟成牛扒而嚟！餐厅自设乾式熟成牛扒柜，所以非常卫生，牛扒质素更有保证，食得更放心！店员建议熟成牛扒最好嘅烹调时间係三成熟，因为经过乾式熟成嘅牛扒，食嘅时候唔会好似平时啲牛扒血淋淋，而且亦係最软腍嘅肉质。我哋就拣咗肉味较浓嘅西冷，牛扒网纹煎得几靓，油香十足，仲带有焦香味道。整体嚟讲，肉质幼嫩，肉味浓郁，好juicy！

焗菠菜忌廉千层薯

薯仔切到薄片，再一层一层叠起烤焗，所以呢个千层薯真係好考厨师功夫。至于食嘅时候，口感真係好有层次感。至于味道除咗菠菜味，仲有丰富嘅芝士忌廉味，芝士焗到焦香，整体嚟讲好creamy呀！

<

Tags：好食,重拾,拍拖,感觉,靓景,情调,西餐,油麻地,Belle

转载：文章来自用户投稿不代表本站观点，如有侵权请联系我们。