〈好食〉捉住冬天的尾巴 将军澳火焰山重庆火锅

【A&M Diary】夏天开始慢慢嚟到，天气越嚟越热，除咗少咗行山同户外活动之外，就连麻辣火锅都要减少啲，因为又辣又热真係顶唔顺呀！今日捉住冬天的尾巴，嚟到将军澳嘅火焰山重庆火锅，斋听个名就知道呢间係主打食辣嘅地方啦！

日式盐烤牛舌
等紧打边炉嘅时候，我哋叫咗串烧，一边食一边等。一碟嘅盐烤牛舌有两串，烧到外层够乾，但仲够juicy，牛味香浓，值得推介。

酱料区
酱料选择好多，除咗常见嘅辣椒粒、蒜蓉、芝麻、香葱、芫荽、豉油、麻油等等之外，呢度仲有魔鬼辣椒粉同劲辣辣油，我只係落咗少少，发觉已经顶唔顺。有兴趣挑战嘅，不妨试试。

鸳鸯锅底
鸳鸯锅底一边拣咗中辣嘅重庆麻辣锅，比预期中唔算辣，至少都唔使疯狂饮水，值得一讚係用咗唔少香料，令汤底香味十足；至于另一边锅底就拣咗清汤，原来清汤即係菇汤，上枱嘅时候已经有唔少冬菇同金菇，菇味香浓。

美国安格斯肥牛
挂起嘅安格斯肥牛，配上乾冰营造嘅烟雾效果，摆盘够晒靓。牛肉油脂分布均匀，肉味香浓，略嫌份量比较少。

秘製格格肉
所谓格格肉即係厚切粒粒猪颈肉，厚切嘅猪颈肉非常有口感，够晒弹牙，好好味呀！

台湾鸭血
食麻辣锅又点少得鸭血呢，鸭血由台湾空运直送，鸭血嫩滑，索晒麻辣汤，好惹味。

竹笙
同样属于「索汤」系列嘅竹笙，我哋将佢放入清汤，竹笙索晒香菇浓汤嘅味道，非常满足。

水鱿鱼
鱿鱼就梗係要配麻辣汤啦，爽口弹牙，好味。

<

Tags：好食,捉住,冬天,尾巴,将军,火焰山,重庆火锅,Diary,

转载：文章来自用户投稿不代表本站观点，如有侵权请联系我们。