〈好Cult〉艺术在身边　深水埗人_人

【A&M Diary】好多人觉得艺术嘅嘢识条铁咩！但艺术唔一定只係存在喺艺术馆内嘅雕塑、画像同陶艺，其实艺术一直都喺我哋身边。由香港设计中心主办嘅「#ddhk设计#香港地」踏入第三年，今年以蜕变为主题，将深水埗区内嘅公共空间同小店打造成城区设计廊，以「深水埗人_人」为今年活动名称，提供两条自助漫游路线，等你重新认识深水埗。

深水埗
大家所认识嘅深水埗，一定离不开鸭寮街。其实深水埗近年由传统嘅旧区发展成创意产业，加上呢度有唔同嘅种族人士居住，令呢个地方更多元化。

大南街垃圾收集站
今日我就同A姐嚟到界限街嘅大南街垃圾收集站开始漫游深水埗。垃圾站？！因为喺深水埗有唔少嘅舖头都有猫店长，所以猫就成为咗深水埗一个成员。喺垃圾站嘅外墙就由本土艺术家兼插画设计师Khristopher联同一班义工，创作左呢幅「人人和喵dd」，主题除咗係佢哋对猫店长嘅印象，背景亦以棉花呼应深水埗布料行业。另外，喺呢幅画作上面，亦有隐藏嘅多啦A梦，大家嚟到嘅时候就考吓眼力啦！

南昌街休憩处
深水埗除咗有各种嘅摊档、地道小食同售卖电子产品闻名之外，其实深水埗亦係一个多元文化嘅社区，除咗基层香港人之外，呢度亦有唔少南亚族裔。所以喺南昌街休憩处就由街坊同设计师合作，设计左「人人鬆dd」，将唔同民族嘅语言写出嚟，大家除咗可以透过QR code了解字句嘅意思同欣赏各地方嘅地道音乐之外，更加可以同身边唔同种族嘅朋友透过呢啲标语作为你哋嘅开场白，为街坊同游客提供一个相聚嘅实体聊天室，令多元嘅社会更加融合。

喺南昌街休憩处除咗有手绘标句之外，亦有Simple People人像，包括曾经喺深水埗开武馆嘅叶问、喺深水埗读小学嘅许冠杰、同曾经喺深水埗居住嘅黄霑同黄家驹等等，表示深水埗係一个卧虎藏龙嘅地方。

阿里皮革
深水埗可以话係一个寻宝嘅地方，如果你肯花啲时间嘅话，可能都会搵到唔少心头好。例如呢间皮革店就有唔同嘅皮革手艺，大家除咗可以直接选购店主设计嘅皮袋或皮革银包，亦可以买啲真皮返去，创作一个属于自己嘅皮革手工。

<

Tags：Cult,艺术,在身边,深水,埗人,Diary,多人,觉得,

转载：文章来自用户投稿不代表本站观点，如有侵权请联系我们。