[香港Staycation] 只有靓景嘅旧酒店 马哥孛罗香港酒店

【A&M Diary】尖沙咀係香港一个热门嘅旅游点同商业区，所以呢区嘅酒店非常多，想玩Staycation嘅，呢区当然有唔少选择！今次同M佬嘅Staycation主题，一于喺海港城唔睇价钱疯狂shopping啦！呢个主题俾佢反完白眼之后，最终都係唔approve，我嘅计划正式宣告失败，我都係乖乖咁留喺今次入住嘅马哥孛罗香港酒店啦！今次呢个马哥孛罗香港酒店Staycation package主打贵宾室礼遇，所以一日三餐都可以喺呢度享用，即刻同大家分享今次嘅入住体验啦！

酒店大堂

马哥孛罗香港酒店位于尖沙咀广东道，旁边就係尖沙咀天星码头同巴士总站，至于港铁站就远少少，步行大概需要10-15分钟。当然，酒店嘅最大卖点就係连接住香港最大面积嘅购物商场：海港城，买嘢同补给日用品都好方便，真係行足1日都有排行呀。加上依家临近圣诞节同农曆新年，节日气氛浓厚，shopping都有唔少优惠呀（我阵间要再同M佬sell吓我个唔睇价钱疯狂shopping嘅大计先得）！

马哥孛罗香港酒店嘅大堂喺正商场旁边，酒店喺1969年开业，係香港其中一间五星级酒店，外墙都睇得出係有历史嘅建筑物，但酒店大堂除咗楼底比较矮，保养同设计都唔差嘅。酒店一共18层，提供665间客房同套房。今日Check-in人流比较多，所以我哋2点嚟到已经大排长龙，而酒店亦未能安排房间，结果要等到3点先可以攞到房卡上房。其实作为五星级酒店，职员大可以先安排我哋喺贵宾室等待，唔洗叫我哋四围行；另外，职员对于我哋嘅package好似唔太了解，亦无讲解早餐同贵宾室嘅地点，呢到嘅培训可能要加强先得。

客房区域

今次入住豪华海景房，一入到房间，会有2个「哗」！第一个「哗」係酒店嘅海景真係好靓，IFC同ICC都睇到，当然唔少得中区商业大厦同维港景啦；第二个「哗」係间房真係好旧，仲有一阵霉味！另外，房间嘅衞生亦做得非常差，窗嘅玻璃充满手掌印，灯掣亦係笠痴痴，所以住之前，我要先用湿毛巾同火酒清洁。讲真，作为一间5星级酒店，加上疫情期间，衞生清洁要求真係相对较高，希望佢哋嘅员工可以细心啲。

至于双人床嘅size非常大，转身反转再反转都无问题，床褥係偏硬，好彩床单柔软又无毛粒。枕头总共有4个，两个较软，两个较硬。窗帘唔係电动模式，所以临瞓同起身嘅时候都要行埋去拉同闩。

房间内仲有一个行李室，除咗放行李，仲放有免费嘅咖啡capsule同茶包。

另外，房间除咗书枱仲有小客厅，无论做嘢定饮嘢倾计，都有好多空间。

浴室区域

浴室乾湿分隔，浴缸同马桶喺厕所内，而洗手盘就喺厕所外。浴缸嘅水压时大时细，用旧款水龙头，所以较水会比较麻烦，胜在可以浸浴。而浴室内嘅日用品係知名品牌：The Merchant of Venice。各项日常用品亦有提供如浴袍、拖鞋、牙刷、浴帽、棉棒等等。

娱乐区域

喺马哥孛罗香港酒店嘅最大娱乐当然係shopping啦，除此之外，酒店附设室外游泳池同健身室。不过，因应疫情，泳池并无开放。至于健身室嘅器材都有唔少，食饱饱都可以过嚟做吓运动。

餐饮服务

酒店设有多间餐厅，包括：Cucina、马哥孛罗咖啡厅、大堂酒廊同西村日本料理。

雅悦厅

今次呢个马哥孛罗香港酒店package主打贵宾室礼遇，所以我哋嘅下午茶同晚餐都喺呢度享用。

呢度嘅下午茶绝对係惊喜，甜品选择超多，味道又好好，虽然鹹点就比较少，但绝对可以自製high tea，要知道喺酒店歎high tea绝对唔平！食物方面有蓝莓芝士蛋糕、纽约芝士蛋糕、葡挞、三文治、朱古力蛋糕、水果等等，加上会不断转款，真係呢个package最吸引嘅地方。

但晚餐就非常失望，职员服务态度又差，refill嘅速度又慢，食物又难食，特别係个扬州炒饭（其实係三色豆+虾炒饭），完全係无味。

<

Tags：香港,Staycation,只有,靓景,嘅旧,酒店,马哥孛,

转载：文章来自用户投稿不代表本站观点，如有侵权请联系我们。