【荷兰热血球迷】Total Collapse

唔知高估定低估，我净係识高古！荷兰在欧国盃16强玩完，Total football沦为Total Collapse，但荷兰人天生乐观，依然识得自我安慰，可喜、可敬。 在布达佩斯，橙迷阵容庞大，场内场外一片橙海，人声鼎沸，奈何荷兰嘅表现有点辜负球迷厚爱。

10人应战嘅橙衣军团净吞双蛋，全场冇射门中框，历来首次，学云拿当话斋：「迪列治（Matthijs de Ligt）领红，改变了比赛格局。」贵价中坚迪列治去咗意甲，技术上进步唔係好大，反而炼成了意大利人毛手毛脚嘅小动作，结果累己累人。

当然，红牌出现之前，荷兰都唔係踢得醒神，剩低10个时，全队开始完全崩坏，阵中缺乏领袖，冇人发施号令、冇人鼓舞士气，几乎零沟通，个个好似滚水渌脚，唔敢上脚。呢个时候，边个唔怀念大哥大云迪克呢？

荷兰主帅法兰迪保亚领军能力饱受质疑，今仗明显係用韦贺斯担正较合适，马伦做后备更好，当落后0:1时，又离奇地用普美斯换马伦，观众无不O晒嘴。再讲，球队在分组赛明知出硬线，最后一场都唔用晒后备，又埋下了更多出局伏线。「我会冷静考虑係咪继续教？」呢个51岁教头赛后有保留，但橙迷大都意见一致，叫佢唔使再考虑咁多。

话分两头，法兰迪保亚完全冇参与外围赛，临时拉夫，决赛周仲要唔见两三件骨干，只能说足总根本搵唔到更好人选走入热厨房。不过，荷兰人好乐天，出局之后自我安慰──仲有F1车手Max Verstappen同环法车手Mathieu van der Poel！

老实讲，青黄不接唔係今日出现，幸好呢队波仲係后生，有时间重建迎接下届世界盃。笔者感谢沿途每个橙，荷兰出局，走笔至此，有缘再会，大家撑住！

文：八十后郁金香
锺意食橙，喜欢橙色，命中注定

图片来源 : ?AFP

Tags：荷兰,热血,球迷,Total,Collapse,唔知,高估定

转载：文章来自用户投稿不代表本站观点，如有侵权请联系我们。